الصبر فين يا سنين طوال وليالي
عيني على الجمل الأصيل العالي
لمّا ينخ بحمل من أحمالي
لكن في كل صباح ..
بانسى الجراح ..
وانقش بفاسي ع الغيطان موالي:
يا ليل يا عين
،
يا ليل يا عين يا أرض يا معزوقة
يا كاشفه من شوقك خطوط مشقوقة
لما حضنتك والبذور مرشوقه
غنيت وفي المغنى فرضي
للسمرا أرضي ..
هيَّ اللي باقيه ع الزمن معشوقه
والعشق زين
،
العشق زين بس الهموم سبّاقة
والشوف حديد بس الغيوم خنّاقة
والانتظار للوعد نار حرّاقة
امتى تطول العيدان ..
دا من زمان ..
مشتاق أنا والحلوه مش مشتاقة
والذل شين
،
الذل شين والأرض بكر عفية
يوم الحصاد وعروسه متحنية
لو شفتها بالقمح متغطية
ح افرش عبايتي واقابل ،
أم السنابل
وح اضم أملي بعد شوق بعنيَّا
وبالإيدين
،
وبالإيدين المعروقين يا مناجل
أطوي ضلامي بالصباح العاجل
وانزل بشومتي ع الغراب الحاجل
ويا يبقى شغل وغُنا ..
طول السنة ..
يا تبقى ثورة في الصدور ومراجل
والوعد دين
عيني على الجمل الأصيل العالي
لمّا ينخ بحمل من أحمالي
لكن في كل صباح ..
بانسى الجراح ..
وانقش بفاسي ع الغيطان موالي:
يا ليل يا عين
،
يا ليل يا عين يا أرض يا معزوقة
يا كاشفه من شوقك خطوط مشقوقة
لما حضنتك والبذور مرشوقه
غنيت وفي المغنى فرضي
للسمرا أرضي ..
هيَّ اللي باقيه ع الزمن معشوقه
والعشق زين
،
العشق زين بس الهموم سبّاقة
والشوف حديد بس الغيوم خنّاقة
والانتظار للوعد نار حرّاقة
امتى تطول العيدان ..
دا من زمان ..
مشتاق أنا والحلوه مش مشتاقة
والذل شين
،
الذل شين والأرض بكر عفية
يوم الحصاد وعروسه متحنية
لو شفتها بالقمح متغطية
ح افرش عبايتي واقابل ،
أم السنابل
وح اضم أملي بعد شوق بعنيَّا
وبالإيدين
،
وبالإيدين المعروقين يا مناجل
أطوي ضلامي بالصباح العاجل
وانزل بشومتي ع الغراب الحاجل
ويا يبقى شغل وغُنا ..
طول السنة ..
يا تبقى ثورة في الصدور ومراجل
والوعد دين
_____
فؤاد قاعود
