لحن في الخلفية خافت...
الشاعر / مصطفى مقلد
دسوق / كفر الشيخ
القلب تعبان م الغياب
احضري للكون سنابل
ادخلي من أي باب
القلب قابل
لسه فاضل بين طلول الروح موده
بس بيني وبين وجودك ..
ألف مد وألف مده
وارتعاشة خوف ووحشه
وانسحاب للأمنيات
واعترافاتي بهزيمتي
آخر الصيف اللي فات
فات عليكي كام رسول بالشوق ما دلك
ع اللي فيها
كام قصيده قلتهالك من يوميها
كام قصيده ف روحي لسه ف انتظارك
لسه ف الأيام فاضل لك
لسه فاضل عمر تاني
فات عليكي كام حكايه عن لساني
لحن ف الخلفيه خافت
كل مادا يمد فيا
لحن رد السمفونيه وخد مكانها
وبهوايا وغصب عني خد مكاني
...للمواجهه
والتراجع والمواجهه
كل وجهه لخطوتي كانت تجاهك
عمر نبض الروح ماضلك
واسالي الأشواق .تقول لك
ليه هطول الشعر رافض
غير يكون لك
