الشاعر | حسن صبرى
بيلا | كفرالشيخ
نفـس البلــد
نفــس الشوارع
الجوامع و الفصول
الملامح والصور
نفس العصور
لمــا الاّمان كان يستخبى
فـ ضل ســور
ينده يقول خلاويص يا هووه
ونـرد ديماَ ونقولــه لسه
نفس الجسور نفس الشجر
نفس الغصون نفس المطر
نفس صوت الساقيه داير
والجميع حواليها حاير
فـ انتظار الارض تطرح
بالبشاير
تنزل على المسرح ستاير
نفس السيناريو المستكين
و الارض تعطش و نور وطين
وتبقى بور و الناس تثور
ساعتين وترجع #تستخبى
نفس كل كتاب قريته
نفس كل شيئ هويته
لما قربت التقيته
واحده واحده بتزهده
وتقل جواك المحبه
وبدال مكان حضن الوطن
بيطمنك
تعيش فـ غربه
وتكون مواطن_أجنبي
وفـ أي ركن بتستخبى
.
