أنا في الحب درويشك
ومجنونك
وأنا كونك
وأنا المسبي فدا عيونك
وأنا لونك
أنا عونك ....
ووقت الجد أكون صونك
أنا العاشق ومش عاشقك
لكن قلبي أسير اسمك
وبيسبح بتكوينك
وأنا الصاين وداد قلبك وأنا عيونك
أنا غازلك وغزالك
ومصري الحب غزة لك
وأنا المحتاج لغزالك
وأنا الفارس لعزالك
وبين هذا وبين ذلك
فأنا منك
ومنك إيه هيبقالي
وبس إنت اللي بقيالي
وفيك الشعر ما يكفي
خلاص النظم بيفارق لسان الحال
بحور الشعر ليه جفت من الترحال
ما عاد فيا كلام يتقال
لو انك ليل
ونجماية وقمراية وسهرانة بتراتيلي
وشطي وبحري مع نيلي
وهمس كلامي ودليلي
هنايا وفرحي والأحلام
وأملي ف رحلة الأيام
بحبك ليل بيتمنى الرجوع للنور
وأعدي بحبك الغالي بلاد وبحور
بحبك نور
ينور لي طريق الحب ويساند
يخليني اكون عاند
ومش عاند وأتعاند في حبك ليه ؟
وأنا المالك براح قلبك
وانا السابح في أحضانك
وأنا الهادم لقضبانك
وسجانك
وأنا الجلاد لخوانك
وأنا الماحي لأشجانك
وبين بابك وبين شيشك
أكون في الحب درويشك
