يا ضلوع يا ماشيين في النهار أنفار
يا نجوم يا سارحين في المسا خفافيش
احنا اللي شايلين القلوب للتار
واحنا اللي مش فارق معانا نعيش
يا معوّد الخيل ع الحديد والنار
بنموت ونحيا عشان رغيف العيش
نبرد ونتدفّي بخبيز الدّار
والدار خزانه وقصعة وشوال خيش
إنذار ورا إنذار ورا إنذار
وطاحونه دايره لا فول ولا قراقيش
لسّه التاريخ محتاج عمر مختار
واللا التاريخ كتبوه بكيلو ياميش؟
يا أيها الصفر اللي جاب أصفار
ورق امتحانك مش في درج النيش
ورق امتحانك ع السكك دوّار
واحنا العمايم وانتم الطرابيش
بنموت ونضحك واحنا لسّه صغار
والموت ما يعنيهش الزغب م الريش
لسّه العقارب لابده في الدوّار
والأفعى سايقه كتايب التفتيش
مسمار جحا اتمخّض وجاب مسمار
سُقنا الغباوه وهدّنا التطنيش
ومشينا نستنى الحقيقه نهار
رغم إننا دراويش ولاد دروايش
